Sa anibersaryo ng RA 11364, mga kwento ng tagumpay at serbisyo para sa mga miyembro ng kooperatiba at kabataan ang umangat.

Isinagawa noong ika-8 ng 2025 sa Lungsod ng Olongapo ang isang espesyal na podcast ng Cooperative Development Authority Region 3 Extension Office (CDA RIII EO). May temang “Haligi ng Kooperatiba: Kaagapay ng Kabataaan”, ang ikatlong episode ng podcast ay may layuning ipagmalaki ang mga kwento ng tagumpay at kabutihang naidudulot ng kooperatiba sa mga miyembro nito lalo na sa mga nagdaang opisyal at mga kabataan.

Bilang pambungad, tinalakay ang Republic Act 11364 o ang batas na nagtatatag at nagpapatibay sa CDA, eksakto sa paggunita sa anibersaryo nito. Pinangasiwaan ng host na si Brian John Mendoza, Cooperative Development Specialist II, ang talakayan na nagsilbing tulay upang maiparating sa publiko ang mahahalagang gawain at layunin ng CDA bilang haligi sa mga kooperatiba.

Kabilang sa mga panauhing nagbahagi ng kanilang best practices ang Mother Rita Multipurpose Cooperative sa katauhan nina Ginang Marivic E. Ebuenga, Vice Chairperson, at Ginoong Jersey E. Sison, General Manger. Ibinahagi nila ang mga programa at benepisyo na kumikilala at pumupugay sa mga naunang pamunuan at opisyal ng kanilang kooperatiba.

Samatala, itinampok naman ng Olongapo Multipurpose Cooperative sa katauhan nina Ginang Josefina A. Mecayer, Chairperson at Ginoong Vener S. Magpayo, General Manager, ang kanilang mga programa para sa mga kabataan, kabilang ang scholarship grants na nagsisilbing tulay upang mabigyan ng mas magandang kinabukasan ang kabataang anak ng mga miyembro. Ipinagmalaki din ng kooperatiba ang ilan sa kanilang mga naging iskolar na empleyado na nila ngayon; angkop na paksa sa paggunita ng nalalapit na Pandaigdigang Araw ng Kabataan sa ika -12 ng Agosto.

Dumalo sa programa si CDA RIII EO Assistant Regional Director Carolina M. Miguel, na nagbigay-diin sa importansya ng RA 11364 pati na rin sa kahalagahan ng pagpupugay sa mga taong naginging haligi ng kooperatiba at pagtutulungan ng mga kooperatiba upang maitaguyod ang mga kabataang magiging susunod na lider ng sektor.

Sa pamamagitan ng live stream sa opisyal na Facebook page ng CDA RIII EO, umabot sa iba’t-ibang probinsya, maging sa ibang bansa ang programa. Sa bawat komento at reaksyon ng mga nanood, malinaw ang mensahe ng episode 3 ng podcast: sa mundo ng kooperatibismo, walang iniiwan, matanda man o bata, may ngipin man o wala.

Sa pagtatapos ng podcast, dala ng mga kalahok at manonood ang iisang diwa—kapag matatag ang haligi, ligtas at maunlad ang tahanan. At sa kaso ng mga kooperatiba, ang haliging iyon ay walang iba kundi ang pagkalinga at paghubog sa susunod na henerasyon.